Page 1 of 1

o kute e mama sina

Posted: Wed Dec 16, 2015 10:57 pm
by jan Alanto
toki ni li toki pi soweli lili tu wan. ona li pana e sona ni: mama sina li sona. o kute e mama sina.

tenpo wan la soweli lili tu wan li lon ma kasi poka mama ona. ona li toki e ni tawa mama: "mama o, mi mute li suli. mi mute li ken jo e tomo li ken lon ona."

mama li toki e ni: "pona. taso sina lon tomo sina la o lukin. soweli ike li lon ma kasi. sina weka tan mi la mi ken ala selo e sina."

ona mute li toki e ni lon tenpo sama: "pona! mi mute li suli!"

ona li tawa ma kasi li alasa e ma pona tawa tomo ona. ona li pali e tomo tu wan.

soweli pi lili mute li wile musi taso. tan ni la ona li pali e tomo pi wawa ala kepeken lipu kasi.

soweli pi lili lili li wile musi poka soweli pi lili mute. tan ni la ona li pali e tomo pi wawa lili kepeken palisa kasi.

soweli pi suli lili li kute e mama ona. ona li pali e tomo wawa kepeken kiwen. ni la soweli ike li ken ala moku e ona.

soweli pi suli lili li kepeken tenpo suli lon pali pi tomo ona. tomo ona pini la ona li musi poka soweli ante.

soweli tu wan li musi mute la soweli ike li kama. ona li toki e ni: "pona! mi lukin e soweli tu wan. mi wile moku e ona!". soweli lili li tawa wawa tawa tomo ona.

soweli ike li wile mute moku. ona li tawa tomo pi soweli pi lili mute li toki e ni: "sina kama ala la mi anpa e tomo sina!"

soweli ike li kon wawa e tomo pi lipu kasi. ona li kama pakala ali li anpa. soweli pi lili mute li tawa tomo pi soweli pi lili lili.

soweli ike li pilin e pona tan ni: tenpo ni la ona li ken moku e soweli tu. ona li kon wawa e tomo pi palisa kasi kepeken wawa mute. ona li wawa lili kin li anpa sama. soweli tu li tawa tomo pi soweli pi suli lili.

soweli ike li pilin e pona mute tan ni: ona li ken moku e soweli tu wan. sama la ona li kon wawa e tomo kiwen. taso ona li wawa mute li awen sama. tan ni la soweli ike li kon kepeken wawa ona ali. taso tomo kiwen li anpa ala.

soweli ike li toki e ni lon lawa: "mi ken ala kon e tomo kiwen. taso mi ken tawa insa ona kepeken lupa kon lon sewi ona."

ona li open tawa sewi pi tomo kiwen. taso soweli lili li kute e tawa pi soweli ike.

soweli pi suli lili li kama jo e sona: "mi ken seli e anpa pi lupa kon. soweli ike li tawa insa la ona li pilin e seli mute! a a a!". ona li seli e anpa pi lupa kon.

soweli ike li kama tawa insa pi tomo pi soweli lili li pilin e seli mute. ona li mu wawa li tawa wawa tan soweli lili.

soweli lili li pilin e pona tan ni. taso ona li kama sona e ni: sina wile kute e mama sina.

Re: o kute e mama sina

Posted: Fri Dec 18, 2015 2:01 pm
by janKipo
ni li pona mute tawa mi. toki ni li pona ali.
nimi 'lipu kasi' li toki pi pona mute.
ken la sina wile toki e nimi 'tawa pali tomo' lon nimi 'lon pali tomo'. taso ken la ala.
don't need second 'tawa' with 'tawa wawa' (doesn't hurt, though).
pona mute kin.

Re: o kute e mama sina

Posted: Fri Dec 18, 2015 3:16 pm
by jan Alanto
pona! Thank you. Of course those choices are just my own stylistic preference ;)